U15 Saisonrückblick 2021/2022

Üsi Saison mitem U15 isch sehr cool gsii. Obwohl Corona mängisch no immer es Problem gsii isch, hemmer trotzdem immer chönne trainiere und die meiste Turnier dureführe. Mier hend i dere Saison au sehr viel neui Spielerinne dezue becho, schlussendlich simmer 16 Chind im Training gsii. Zuegeh, es isch us dem Grund ned immer ganz eifach gsii, allne Meitli grecht zwerde, wils ebe so viel gsii sind. Vor allem wegem Platz und weg de riese Niveauunderschied. Und es isch au oft schwierig gsii, vor allem für üs Trainer, de Überblick ned zverlüre. Mit de Ziit hemmer abr en gwüssi Routine gfunde und denn isches wük guet gange i de Trainings. S Team hemmer denn in zwoi Stärcheklasse (Anfänger und Fortgeschrittene) underteilt und so hets denn au wük guet funktioniert.

Au vor allem, wil üsi Meitli sehr ehrgiizig gsii sind und wük gern is Training cho sind. Bi eus Trainer hets au en chliine Wechsel geh. Ahfangs Saison han ich no Understützig vo de Armina und de Charlotte becho, wo denn abr leider ufghört hend. Denn nach de Summerferie sind d Alicia und Alissa dezue cho, wo mier au en riese Hilf gsii sind. Und natürlich d Alketa wo die meisti Ziit die Chliine überno het und ihne au sehr viel biibracht het. Allgemein isches sehr schön gsii, de Fortschritt bi allne Spielerinne zgseh und dass sich all immer müeh geh hend, besser zwerde.
Was üses Team sicher einzigartig gmacht het, isch de Teamzemehalt und de Teamgeist. 

Und das het sich au a de Mätch glohnt: D Meidlis vo de zweite Gruppe sind vo Match zu Match besser worde, au wenn sie schlussendlich ned vieli Mätch gwunne hend. Abr ich gsehne bi allne Meitlis es mega Potenzial und glaube fest dra, dass sie i de nöchste Saison no meh chönd lerne und besser werded.
Die ersti Gruppe hed erfreulicherwiis de 2. Platz erreicht. Sie hend sich bi de Turnier sehr durch ihre Ergiiz uszeichnet und hend somit die meiste Mätch gwunne. Im Gsamte isches en super Saison gsii mit vielem, wo d Spielerinne, abr au mier Trainer, a Erfahrige hend döffe sammle.